Një javë intezive me punime në projekte të shumta kapitale komunale u realizua javën që lam pas. Në mbledhjen e mëngjesit të udhëhequr nga Nënkryetari i Komunës Sabedin Vishi, ekzekutivi komunal raportoi për aktivitetet dhe punët nga java që lam pas, si dhe planifikimet për javën që sapo kemi nisur.
Drejtoria e arsimit njoftoi se me rastin e përfundimit të vitit shkollor 2022-2023, me qëllim të shfrytëzimit të kohës së pushimit dhe për të mos penguar më pas procesin mësimor, kanë filluar punimet në projektet kapitale në fushën e arsimit. Drejtori Zahir Doda bëri të ditur se punimet janë duke u zhvilluar në projektin “ Renovimi i objekteve shkollore- ndërrimi i kulmit dhe izolimit të ShFMU “ Qamil Ilazi” afër vendit të quajtur “ Fusha e Pajtimit” si dhe punimet në projektin “ Ndërtimi i sallës së edukatës fizike në fshatin Biqec”, projekte këto që do të financohen nga buxheti komunal. Nga ana tjetër tashmë Drejtoria e Kulturës , Rinisë dhe Sportit është në fazën përfundimtare të përgatitjes së ditëve të mërgatës. Drejtoresha Hafize Sallahu tha se edhe këtë vit planifikohet që të organizohen shumë aktivitete kulturore e sportive për mërgatën, me qëllim të krijimit të një atmosfere bashkëpunuese dhe argëtuese për ta.
