Ekzekutivi i komunës, në takimin e sotëm të cilin e ka udhëhequr kryetari i komunës, z. Xhabir Zharku, shqyrtoi çështjen e harmonizimit të koeficienteve të pagës duke u bazuar në përshkrimin e vendeve të punës së zyrtarëve komunal, shtimin e disiplinës në punë dhe orientimet buxhetore përkatësisht propozoi bartjen e bilanceve të pashpenzuara nga të hyrat vetjake komunale të vitit 2009 në vitin 2010
Kryetari, z. Zharku u sugjeroi drejtorët që gjatë javës të bëjnë harmonizimin e koeficienteve të pagës duke u bazuar në përshkrimin e vendeve të punës së zyrtarëve, ndërsa javën e ardhshme të saktësohet kjo çështje. Kryetari duke folur për disiplinën në punë tha se vërehet një rënie prandaj duhet shtuar disiplina duke synuar përkushtim edhe më të shtuar.
Ekzekutivi i komunës në takimin e sotëm ka prezantua Propozim – Vendimin për bartjen e bilanceve të pashpenzuara nga të hyrat vetjake të vitit 2009 në vitin 2010.
Sipas Propozim – Vendimit, shuma e mjeteve të pashpenzuara prej 118,838.72 € do të barten në vitin 2010 dhe do të shpenzohen, përkatësisht do të rishpërndahen në 8 programet buxhetore; në Zyrën e kryetarit, Administratë, Buxhet dhe Financa, Shërbime Publike,Bujqësi Zhvillimi Rural dhe Pylltari,Urbanizmi, Kadastri dhe Mbrojtja e Mjedisit, Shëndetësia Primare dhe Arsimi e Kultura. Për paga do të ridestinohen 26,573.80 euro, mallra dhe shërbime 28,574.57 euro, për shërbime komunale 3,141.00 euro, për subvencione 8,950.00 euro dhe investime kapitale 51,599.35 euro.
Ekzekutivi i komunës mori vendim të mbështes me 5,000 euro Organizatën e Veteranëve të Luftës për shpenzimet më të domosdoshme për funksionimin e kësaj organizate.
