Me shumicë votash, anëtarët e Kuvendit të Komunës kanë zgjedhur Selajdin Tronin si Kryesues të Kuvendit Komunal të Kaçanikut.
Ky takim ishte vazhdimësi e mbledhjes së Kuvendit të Komunës së Kaçanikut të datës 08.12.2025, me pikën e mbetur të rendit të ditës: zgjedhjen e Kryesuesit të Kuvendit të Komunës, nën drejtimin e anëtarit më të vjetër të Kuvendit, Xhelal Dema.
Në takim mori pjesë edhe Kryetari i Komunës së Kaçanikut, Sabedin Vishi.
Në fjalën e tij, Kryesuesi i sapozgjedhur, Selajdin Troni, falënderoi asambleistët për besimin e dhënë për të udhëhequr punimet e seancave të Kuvendit gjatë këtij mandati.
“Ky nuk është vetëm besim dhe privilegj, por edhe një obligim për të punuar pa anësi dhe për të bashkëpunuar me të gjitha grupet politike të përfaqësuara në Kuvendin Komunal. Ky institucion – Kuvendi i Komunës – është zemra e vendimmarrjes lokale. Është vendi ku ne, pavarësisht bindjeve politike apo dallimeve të tjera, duhet të bashkojmë forcat për të mirën e qytetarëve tanë. Jam i përkushtuar që këtë përgjegjësi ta ushtroj me profesionalizëm, me transparencë dhe me respekt të ndërsjellë,” tha ndër të tjera Kryesuesi i Kuvendit, Selajdin Troni.
Selajdin Troni ishte anëtarë i Kuvendit Komunal nga mandati i kaluar nga rradhët e Partisë Demokratike të Kosovës dhe është djalë i Heroit Izahir Troni.
