Me një minutë heshtje për nderim të jetës dhe veprës së Rreshterit Muhamet Lika,
filloi takimi i organizuar nga Stacioni i Policisë në Kaçanik, ku u prezantua raporti vjetor i punës dhe rezultateve të arritura gjatë vitit 2025.
Komandanti i Stacionit të Policisë në Kaçanik Emrush Lalinovci, në fjalën e tij falenderoi institucionet komunale për bashkëpunim korrekt, e poashtu falenderoi edhe drejtorinë rajonale në Ferizaj, gjykatën, shoqërinë civile, mediat dhe qytetarët, duke shtuar se policia nuk mund të jetë e suksesshme pa partneritet me komunitetin. Më tutje theksoi rëndësinë që edhe këtë vit të vazhdohet me bashkëpunime të reja, rritje të transparencës, avancim të stafit etj.
Ndërkohë, Kryetari i Komunës Sabedin Vishi, falënderoi Policinë e Kosovës për punën dhe angazhimin e pandalur në ruajtjen e rendit dhe sigurisë publike, duke vlerësuar lart profesionalizmin e zyrtarëve policorë për t’u shërbyer qytetarëve në çdo kohë. Kryetari Vishi konfirmoi edhe njëherë gatishmërinë e komunës për bashkëpunim dhe përkrahje të punës së Stacionit të Policisë në Kaçanik, duke uruar që në vitin 2026 të kemi sa më pak raste e vepra penale.
Takimin e përshëndeti edhe Major Avni Oruqi Shef i Operativës Rajonale, i cili vlerësoi punën e jashtëzakonshme të Stacionit të Policisë në Kaçanik, duke shtuar se viti që lam pas ishte vit i rëndë, por asnjëherë nuk e ndali përkushtimin për mbrojtjen e rendit dhe ligjit.
Gjatë prezantimit të raportit Toger Vahid Hyseni, paraqiti në mënyrë të detajuar punën, angazhimet dhe të arriturat e Stacionit Policor në Kaçanik gjatë vitit që lamë pas, duke vënë në pah edhe sfidat me të cilat janë përballur. Sipas raportit për vitin 2025 ka pasur rritje të veprave penale për 25 %, ndërsa ka pasur rritje edhe në zbulueshmërinë e rasteve dhe rritje në planet operative, krahasuar me vitin paraprak. Ndërsa sfidë e Stacionit mbetet edhe më tutje mungesa e stafit.
Në fund të takimit u ndanë letër falenderime, si shenjë mirënjohje për bashkëpunimin e mirë dhe mbështetjen e ndërsjellë për Komunën e Kaçanikut respektivisht Kryetarin Besim Ilazi, përfaqësuesit institucionalë, si dhe për zyrtarët dhe policët e këtij stacioni në funksion të sigurisë dhe mirëqenies së qytetarëve.
