Qytetarë nga komuna e Kaçanikut e më gjerë, kanë përkujtuar rënien e 28 dëshmorëve të kombit dhe 32 martirë të luftës, të cilët ranë më 9 prill 1999 në Rakoc dhe Lagje të Re. Kryetari i Komunës Besim Ilazi, në fjalën e tij, në manifestimin në Rakoc, vlerësoi lartë kontributin dhe sakrificën e dëshmorëve dhe martirëve të rënë për lirinë e vendit, duke shtuar se këta dëshmorë e martirë, u bënë themel i fortë i lirisë e cila kishte nisur të sillte frytet e para së bashku me pranverën e vonë të asaj kohe të rëndë për secilin nga ne. Të rënët e Lagjes së re e Rakocit u nderuan edhe nga Deputet e përfaqësues të institucioneve qendrore. Kryeministri i Kosovës Albin Kurti i cili ishte i pranishëm në këto manifestime, vlerësoi sakrificën e të rënëve për lirinë e vendit tonë.
Në emër të Komunës së Kaçanikut në manifestimin në Lagje të Re të pranishmëve iu drejtua drejtoresha e Administratës së Përgjithshme Dardana Dauti, ndërsa në emër të familjeve të dëshmorëve, të pranishmit i përshëndetën dhe falënderuan për pjesëmarrje djali i dëshmorit Komandant Izahir Troni- Selajdini si dhe djali i dëshmorit Daut Rakocit- Iliriani.
Nxënësit nga Shkolla Fillore “ Emin Duraku” prezantuan një program të pasur kulturo artistik. Pranë pllakave përkujtimore të të rënëve janë vendosur lule të freskëta dhe janë bërë homazhe edhe te Varrezat e Dëshmorëve të Kaçanikut.
