Komuna e Kaçanikut përmes Drejtorisë për Buxhet dhe Financa dhe drejtorisë së Arsimit , ka mbajtur sot konsultimin publik për Kornizën Afatmesme Buxhetore ( KAB) 2026-2028 me sektorin e arsimit.
Takimin e hapi Kryetari i Komunës Besim Ilazi, i cili tha se me qëllim të rritjes së transparencës po e organizojmë këtë takim publik, duke cekur se në vazhdimësi komuna ka bërë investime në arsim, si në infrastrukturë, pajisje me kabinete e mjete të tjera të punës si dhe investime në terrene sportive e në veçanti me sallat e edukatës fizike dhe hapjen e puseve për ujë të pijes në të gjitha shkollat e komunës sonë. Kryetari ceku sfidat me të cilat po ballafaqohen si institucione tash e sa vite nga mos përkrahja e nivelit qendror, ku të gjitha kërkesat tash e sa vite protokollohen dhe përcillen në ministritë e linjës, por që asnjëherë as përgjgije nuk është marrë. Nënkryetari i Komunës Sabedin Vishi shpalosi detaje nga ky dokument buxhetor, duke shtuar se buxheti për vitin e ardhshëm do të jetë afër 13 milion e 169 mijë euro, ndërsa për investime kapitale do të ndahen 2 milion e 829 mijë euro, ku në arsim parashihet të bëhen investime në infrastrukturë, në salla të edukatës fizike, vendosje e paneleve diellore në shkolla, digjitalizim të shkollave dhe kabinete si dhe në pajisje të shkollave me materiale të nevojshme.
Në takim prezantoi edhe drejtori për Arsim Zahir Doda dhe drejtori për financa Bahri Selimi, të cilët dhanë detaje nga pjesa financiare, duke shtuar se fondi për arsim bazuar për numër të nxënësve është i pamjaftueshëm dhe shpesh herë komuna ka kaluar këto kufizime duke i tejkaluar me të vetmin qëllim krijimin e kushteve sa më të mira në arsim, ku ndër vite shuma e ndarë në arsim vetëm për investime kapitale për një vit ka kaluar gjysmë milioni. E investimet nuk janë ndalur edhe në financimin e shërbimeve të shkollave, ndarja e bursave për studentë etj.
Të pranishmit në debat përfaqësues të shkollave, kërkuan nga Ministria e Arsimit që të vazhdojnë punimet në objektin shkollor në Doganaj, objekt i filluar tash e sa vite dhe të filloj me ndërtimin e objekteve të reja, ndërsa kërkuan që në buxhetin e ardhshëm komunal të pararshihen investime në infrastrukturën arsimore në digjitalizim si dhe terene sportive.
