Komuna e Kaçanikut përmes Drejtorisë për Buxhet dhe Financa, ka mbajtur sot konsultimin publik për Kornizën Afatmesme Buxhetore ( KAB) 2026-2028.
Takimin e hapi Kryetari i Komunës Besim Ilazi, i cili tha se me qëllim të rritjes së transparencës po e organizojmë këtë takim publik, ndërsa shtoi se edhe më tutje si institucione komunale vazhdojmë të ballafaqohemi me sfida nga mos përkrahja e nivelit qendror si dhe me pasojat e kontratës kolektive që po dëmtohet buxheti komunal.
Nënkryetari i Komunës Sabedin Vishi shpalosi detaje nga ky dokument buxhetor, duke shtuar se buxheti për vitin e ardhshëm do të jetë afër 13 milion e 169 mijë euro, ndërsa për investime kapitale do të ndahen 2 milion e 829 mijë euro, ku parashihen investime në Administratë publike, shërbime publike, si rrugë, kanalizime, trotuare e ujësjellës, mirëqenie sociale, shëndetësi, arsim, turizëm e zhvillim ekonomik si dhe bujqësi e ambient.
Të pranishmit në debat përfaqësues të lagjeve dhe fshatrave të komunës, kërkuan investime në rregullim të rrugëve, përroskave, kanalizim, arsim etj.
Të hënën ( 16.06.2025) do të mbahet konsultimi i dytë publik për KAB me sektorin e arsimit.
