Duke u bazuar në ligjin Nr.03/L-040 për Vetëqeverisje Lokale, Statutin e Komunës, dhe nenin 6 pika 1.6 të Udhëzimit Administrativ ( MAPL) Nr.06/2018 për Standardet Minimale të Konsultimit Publik në Komuna, Komuna e Kaçanikut sot ka organizuar Debat Publik me temë: Korniza Afatmesme Buxhetore ( KAB) 2023-2025.
Në takim prezantoi Kryetari Besim Ilazi dhe nënkryetari Sabedin Vishi. Kryetari Ilazi fillimisht inkurajoi qytetarët që të jenë pjesë e diskutimeve publike, në mënyrë që secili nga ta të ketë mundësinë e drejtpërdrejtë që të paraqes kërkesat e tyre, ndërsa tha se për vitin e ardhshëm janë afër 3 milion euro të parapara për investime komunale, andaj sygjeroi të pranishmit në debat që të orientojnë shpërndarjen sa më të drejtë dhe korrekte të këtyre mjeteve në projekte të ndryshme, që për qëllim kryesor kanë mirëqenien qytetare. Takimin e përshëndeti edhe kryesuesi i Kuvendit Komunal Kemajl Murseli, i cili shprehu rëndësinë e madhe të pjesëmarrjes së qytetarëve në debate publike, ngase sipas tij pjesëmarrja sa më e madhe e qytetarëve në këto takime publike ngrit edhe performancën komunale, ndërsa kërkoi që debati të orientohet që nga të hyrat buxhetore komunale e deri tek destinimi i tyre. Ndërkohë, Drejtori për Buxhet dhe Financa Bahri Selimi shpalosi disa detaje nga Korniza Afatmesme Buxhetore ( KAB) 2023-2025. Drejtori Selimi tha se buxheti i Komunës së Kaçanikut për vitin 2023 do të tejkalon masën monetare prej 10 milion euro. Ai më tutje tha se përmes KABK është shpalosur vizioni afatmesëm komunal ku edhe realizimi i objektivave është paraparë të arrihen përmes hapave konkret dhe atë përmes caktimit të shumave buxhetore për secilin projekt dhe aktivitet.
Të pranishmit në debat përfaqësues të lagjeve dhe fshatrave të Komunës së Kaçanikut, përfaqësues nga shoqëria civile dhe qytetarë të tjerë, kërkuan që investimet komunale kryesisht të orientohen në ujësjellës, kanalizim, rregullim dhe asfaltim të rrugëve, shëndetësi, arsim, rini, krijim të kushteve për qasje dhe pjesëmarrje të personave me aftësi të kufizuara etj. Në këtë takim ekzekutivi komunal u përgjigj në përgjithësi në kërkesat e qytetarëve, ndërsa ditëve në vazhdim do të publikohet edhe raporti nga ky takim, ku njëkohësisht të gjitha kërkesat do të marrin edhe përgjigje zyrtare nga ekzekutivi komunal.
