Kryesuesi i Kuvendit të Komunës së Kaçanikut përmes Komitetit për Politikë dhe Financa në koordinim me Drejtorinë për Ekonomi, Financa dhe Zhvillim Ekonomik, me qëllim të informimit dhe pjesëmarrjes së gjerë dhe aktive të publikut dhe në pajtim me legjislacionin në fuqi, në vazhdën e aktiviteteve debatuese publike, sot organizoi debat publik me temë buxheti komunal për vitet 2020-2022, me theks të veçantë për vitin 2020. Debatin e hapi Kryesuesi i Kuvendit Kemajl Murseli, i cili tha se të gjitha takimet publike janë organizuar me qëllim të rritjes së gjithëpërfshirjes qytetare në vendimmarrje si dhe në rritje të transparencës buxhetore, ndërsa anëtarët e KPF-së dhe ekzekutivi komunal do të përcjellin me vëmendje kërkesat për t’i inkorporuar më pas në buxhetin komunal në bazë të mundësive dhe caktimit të prioriteteve. Në takim prezantoi edhe Nënkryetari i Komunës Ylber Bajra. Drejtori për Ekonomi, Financa dhe Zhvillim Ekonomik Bahri Selimi prezantoi propozim buxhetin për vitin 2020 , i cili tha se buxheti total i komunës së Kaçanikut për vitin 2020 është në shumë prej 9,000,530.00 euro, shumë kjo më e larta e buxhetit e arritur që nga paslufta. Drejtori Selimi shpalosi edhe ndarjet buxhetore, të cilat sipas tij janë në përputhje me Qarkoren buxhetore 2020/02 të Ministrisë së Financave:
1- Shpenzime për Paga dhe Mëditje: 5,759,851.00 euro,
2- Shpenzimet e Mallrave dhe Shërbimeve 920,000.00 euro
3- Shpenzimet e Shërbimeve Komunale 170,000.00 euro
4- Subvencionet dhe Transferet 206, 540.00 euro
5- Shpenzimet në Investime Kapitale 1,944,139.00 euro. Drejtori Selimi inkurajoi të pranishmit në debat që të diskutojnë për lëvizjet e mundshme në buxhet, gjithmonë duke u bazuar në kërkesat e tyre të arsyeshme. Të pranishmit në debat, qytetarë, , administrator fshatrash, përfaqësues nga shoqëria civile etj, kërkuan më shumë investime në projektet infrastrukturore, projekte shkollore, ujësjellës e kanalizim, trotuare, ndriçim publik, investime në ambient, Poashtu u tha se propozim buxheti është gjithëpërfshirës për qytetin e Kaçanikut, lagjet dhe të gjitha fshatrat. Këtij debati publik i kanë paraprijë edhe debatet e mëhershme me grupe të ndryshme të interesit, me sektorin shëndetësor dhe arsimor në Kaçanik.
