Kuvendi i Komunës Kaçanik mbajti mbledhje solemne për nder të datave të shënuara 5, 6 dhe 7 Mars “Epopeja e UÇK”, në përkujtim të Ushtrisë Çlirimtare të Kosovës, Komandant Adem Jasharit dhe rënies heroike të Familjes Jashari.
Mbledhjen e Kryesoi Kryesuesi i Kuvendit Komunal Kemjl Murseli, i cili fillimisht kërkoi një minutë heshtje në nderim të të rënëve për atdhe. Ndërsa ndër tjera tha se sot është momenti i veçantë të shprehim vlerësimin, mirënjohjen, nderimin dhe respektin me përkulje të thellë për familjen heroike të Komandant Adem Jashari dhe për të gjithë dëshmorët e martirët e lirisë.
Nga ana tjetër Kryetari i Komunës së Kaçanikut Besim Ilazi, e vlerësoi këtë ngjarje si një monument i përjetësisë së luftës së shenjtë të Ushtrisë Çlirimtare të Kosovës.
“ Muaji mars na kujton sakrificën, dhe qëndresën e popullit tonë. Ndërsa ditët 4,5, dhe 6 Marsi janë ditët e krenarisë sonë mbarë kombëtare dhe përkujtimit të luftës së shenjtë të Ushtrisë Çlirimtare të Kosovës, të prirë nga Komandant Adem Jashari. Po sot kujtojmë heroizmin e pa shoq të familjes Jashari e cila u bë akt themeltar për lirinë e atdheut, duke u bërë një rast i veçantë kudo nëpër botë, një familje e bashkuar stoike, e për tu bërë më vonë monument përjetësie deri sa të ketë jetë në këtë tokë.
Për tri ditë radhazi, në Kullat e Jasharajve, në këto kulla të qëndresës, kjo familje u bëri ballë sulmeve të fuqishme, ku burra, gra e fëmijë, luftuan e kënduan deri në frymën e fundit, me një qëllim e ideal të përbashkët”.
Ndër tjera Kryetari shtoi se Në këtë ditë të shënuar e të rëndësishme për secilin nga ne, kujtojmë sakrificën sublime të dëshmorëve, martirëve , ushtarëve e eprorëve të Ushtrisë Çlirimtare të Kosovës, kujtojmë sot sakrificën edhe për qindra e mijëra djem e vasha të anës së Kaçanikut që tashmë ishin rreshtuar në radhët e Ushtrisë Çlirimtare të Kosovës, nën udhëheqjen madhështore të dy Komandantëve Agim Bajrami e Qamil Ilazi.
Janë mbi dy dekada që nga ajo ngjarje, por sado që koha kalon, Epopeja e Ushtrisë Çlirimtare të Kosovës, do të jetë monumenti më i mirë i përjetësisë dhe madhështia dhe kauza e vet popullit tonë, me vite e shekuj për liri e pavarësi të vendit tonë.
Në emër të Organizatës së Veteranëve të luftës së UÇK-së foli veterani Xhabir Elezi, i cili tha se familja Jashari mbetet shembull unik i qëndresës dhe rezistencës kombëtare.
Me rastin e Epopesë së lavdishme, folën për këtë ngjarje përfaqësuesit e partive politike në Kuvendin Komunal:
Rrustem Zenuni ( PDK) mes tjerash tha se sot jemi mbledhur për të nderuar një nga kapitujt më të lavdishëm të historisë sonë kombëtare—Epopenë e UÇK-së, të zhvilluar më 5, 6 dhe 7 mars të vitit 1998, duke shtuar se këto tri ditë nuk janë thjesht data në kalendar, por janë simbol i qëndresës, guximit dhe sakrificës sublime për lirinë e Kosovës.
Ndërkohë Ardita Rrahmani ( LDK) në fjalën e saj tha se sot përkujtojmë sakrificën, sublime të të gjithë atyre që dhanë jetën për lirinë e atdheut, ndërsa muaji mars është muaj i lavdisë, rezistencës, sakrificës dhe vetflijimit, ndërsa familja Jashari është pikënisja dhe kurorëzimi i lirisë sonë.
