Kuvendi Komunal në Kaçanik sot ka mbajtur seancën inauguruese me rastin e fillimit të mandatit të ri qeverisës.
Në ceremoninë solemne morën pjesë përfaqësues të institucioneve qendrore e lokale dhe ndërkombëtare, përfaqësues të shoqatave të dala nga lufta e Ushtrisë Çlirimtare të Kosovës, përfaqësues fetarë e të shoqërisë civil si dhe mysafirë të tjerë.
Seanca u udhëhoq nga anëtari më i vjetër i Kuvendit Komunal Xhelal Dema, i cili uroi anëtarët e sapozgjedhur për mandatin e fituar, duke theksuar përgjegjësinë dhe rëndësinë e rolit të tyre në Kuvendin Komunal.
21 anëtarët e zgjedhur të Kuvendit dhanë betimin zyrtar, duke zyrtarizuar kështu fillimin e ushtrimit të detyrës së tyre.
Po ashtu, para Kuvendit Komunal u betua edhe Kryetari i Komunës së Kaçanikut Sabedin Vishi, i cili në fjalën e tij falenderoi qytetarët për besimin e dhënë, duke shtuar se ky besim është përgjegjësi për punët që kemi para vetes.
“ Jam sot përballë secilit qytetarë, pranë të zgjedhurve, në këtë vend e momentum të shënuar, që më bën nder e priviliegj të veshur me petkun e përgjegjësisë- Të jemi i zgjedhuri juaj- nën udhëheqjen e qytetit tonë të historisë e lavdisë sonë- Kaçanikut- dashurisë sonë të përbashkët.
Jam thellësisht mirënjohës për besimin që më keni dhënë, për mbështetjen tuaj dhe për shansin që më keni ofruar të shërbej si kryetar i Komunës së Kaçanikut.
Me përulje, nder dhe respekt nga zemra Faleminderit dhe për herë mirënjohës.
Sot për secilin nga ne është një ditë e veçantë për komunën tonë. Është dita kur ne jo vetëm inaugurojmë një mandat të ri qeverisës, por edhe riafirmojmë vizionin, shpresën dhe vullnetin e qytetarëve të Kaçanikut për një të ardhme më të mirë.
Ky besim nuk është privilegj—është përgjegjësi. Dhe unë jam sot para jush me zotimin e plotë se do ta ushtroj këtë përgjegjësi me ndershmëri, përkushtim dhe transparencë” tha Kryetari Vishi. Tutje ai u zotua se do të jetë konstruktiv dhe bashkëpunues me të gjitha grupet politike të përfaqësuara në Kuvendin Komunal, sepse në fund të gjithëve na bashkon një qëllim- Mirëqenia e qytetarëve të Komunës sonë. Ai shtoi se përkujdesja institucionale nuk do të mungoj ndaj shumë kategorive të dala nga lufta, ndaj vlerave të Ushtrisë Çlirimtare, ndaj familjeve të dëshmorëve, invalidëve e veteranëve të luftës, që janë pjesa më e ndishme e historisë dhe lirisë sonë. Ndërsa prioritetet e kryetarit do të jenë të fokusuara në zhvillim ekonomik, Infrastrukturë, arsim dhe rini, shëndetësi dhe mirëqenie sociale.
Pas seancës u bënë homazhe në Kompleksin Memorial te Varrezat e Dëshmorëve në Kaçanik.
