Nxënësit e fshatit Ivajë, nga sot do të mësojnë në objektin e ri shkollorë, me hapësira të reja dhe moderne.
Sot është përuruar objekti i ri shkollor, në Shkollën Fillore “ Dituria” në Ivajë.
Kryetari i Komunës Besim Ilazi, uroi nxënësit, mësimdhënësit si dhe prindërit për objektin e ri shkollor, duke shtuar se tashmë po përmbushet edhe një objektiv i institucioneve komunale, për ndërtimin e shkollave të reja si dhe për krijimin e kushteve sa më të mira për mësimnxënie. Kryetari Ilazi shtoi se sot është një moment i veçantë , dhe është një dritë shprese për të ardhmen e vendit.
Drejtori i kësaj shkolle Nexhati Luta, poashtu uroi nxënësit dhe mësimdhënësit për objektin e ri shkollorë, ndërsa premtoi suksese të reja, duke shtuar se objekti i vjetër tashmë nuk kishte kushte për mësim, si dhe ishte bërë një vend ir rrezikshëm për nxënësit. Në fund të fjalimit të tij drejtori Luta falenderoi institucionet komunale për investimet e realizuara në këtë objekt. Nxënësit, mësimdhënësit dhe prindërit i uroi edhe Zëvendës Ministri i Arsimit në detyrë Azem Guri. Në fund të ceremonisë nxënësit e kësaj shkolle shfaqën një program të pasur artistik, me traditat tradicionale ndër vite të popullit tonë. Ky objekt i ri shkollor është komplet investim nga Komuna e Kaçanikut, ndërsa ka kushtuar mbi 100 mijë euro, kurse punët janë kryer në një afat rekord. Objekti është i pajisur me inventarë, rrjet interneti, ngrohje qendrore si dhe me të gjitha kushtet e tjera për zhvillim të procesit mësimor.
