Në njëzet vjetorin e rënies, janë përkujtuar 14 dëshmorë dhe 15 martirë të rënë në fshatin Kotlinë. Me këtë rast u përurua edhe dokumentari për masakrën e Kotlinës me autor Ahmet Qeriqi. Në akademinë përkujtimore Kryetari i Komunës së Kacanikut Besim Ilazi, përshëndeti të pranishmit, ndërsa vlerësoi përurimin e dokumentarit. “sot, ndryshe nga herat e tjera, ngjarjen e kobshme të 24 marsit të vitit 1999, do ta prezantojmë përmes dokumentarit, i cili më së miri do të portretizoj këtë ditë, e cila atë kohë gjakosi pranverën në Kotlinë. Ishte një pranverë e brishtë në gjithë Kosovën, ishte një pranverë që ujiti lulet me gjakun e dëshmorëve dhe martirëve. Sot po përurojmë një dokumentarë, i cili do të mbetet pjesë e historisë dhe do ta pasurojë atë përmes rrëfimit të drejtë të ngjarjes, e cila për shumëkënd mund të duket si një legjendë. Ky takim përkujtimor bëhet më madhështor, në përvjetorin e 20-të jubilarë të ngjarjes që sot shënojmë”, tha Kryetari Ilazi. Ai në fund të fjalimit të tij tha se sot po përkujtojmë dëshmorët e martirët e fshatit Kotlinë si dhe të gjithë dëshmorët e Komunës së Kaçanikut dhe të Kosovës, kujtojmë veprimtarët ndër breza të historisë dhe të gjithë ata që gjatë tërë jetës së tyre u munduan me përkushtimin më të madh për lirinë dhe pavarësinë vendit, ata që u bënë të pavdekshëm me veprat e tyre për liri dhe dinjitet njerëzor, ata të cilët dhanë më të shtrenjtën jetën e tyre, duke shtuar se në çdo përvjetorë, përkundër dhimbjes dhe pikëllimit, ndjehemi krenar për historinë tonë, për të gjithë ata që nuk kursyen asgjë për të realizuar ëndrrën shekullore për Kosovën shtet të pavarur e sovran.
Ndërkohë, në emër të Organizatës së Veteranëve të Luftës së UÇK-së foli Hajrush Kurtaj- ish zëvendës Komandant i Brigadës 162 “Agim Bajrami”, i cili e konsideroi Betejën e Kotlinës si njërën ndër betejat me të përgjakshme të luftës së fundit në Kaçanik., e cila ishte edhe hakmarrje e okupatorit serb nga humbjet e njëpasnjëshme që kishte pësuar nga UÇK-ja, ndërsa ceku shumë detaje të kësaj beteje. Ndërkohë në emër të këshillit organizues dhe në emër të të rënëve të Kotlinës, foli Jeton Kuqi, i cili tha se më të dashurit tanë u ndanë nga jeta në mënyrën më barbare, kurse i kujtojmë me dhembje dhe krenari, duke ruajtur kujtimet më të bukura për to. Në fund u shfaq dokumentari kushtuar masakrës së Kotlinës.
Pranë lapidarit të ngritur dhe te vendi i rënies janë vendosur kurora lulesh e po ashtu, kurora lulesh janë vendosur te Kompleksi Memorial i Dëshmorëve dhe janë bërë homazhe. Në Kotlinë, në luftimet e 9 marsit të vitit1999, ranë dy dëshmorë si dhe u djeg një pjesë e shtëpive të fshatit, ndërsa më 24 mars të vitit 1999, në mënyrën më çnjerëzore u vranë 26 kotlinas, prej tyre 11 dëshmorë dhe 15 martirë ndërkaq më vonë karvanit të dëshmorëve nga ky fshat iu shtua edhe një dëshmor i cili ra në luftimet në kufirin shqiptaro-shqiptar, në Koshare.
