Nënkryetari i Komunës së Kaçanikut Ylber Bajra, priti në takim Zëvendësministrin e Ministrisë së Punëve të Jashtme, Besnik Hoti i shoqëruar nga Drejtori për Diplomaci Ekonomike, Guner Ureya.
Zëvendësministri Besnik Hoti tha se qëllimi i vizitës është prezantimi i mundësive për promovimin e komunave përmes diplomacisë ekonomike të Republikës së Kosovës.
Ai tha se Ministria e Punëve të Jashtme e Republikës së Kosovës së bashku me të gjitha misionet janë në dispozicion për të bërë edhe promovimin e komunave, sidomos për promovimin e mundësive për investime në këto komuna.
Ndërsa drejtori i Departamentit për Diplomaci Ekonomike, Guner Ureya, e sqaroi në tërësi projektin e ministrisë, rëndësinë që ka ky projekt, në raport me zhvillimin ekonomik të vendit dhe ndikimin e rëndësinë e nivelit lokal, në këtë drejtim, format e bashkëpunimit dhe rëndësinë e binjakëzimeve me komunat nga vendet tjera.
Nga ana tjetër, Nënkryetari Ylber Bajra tha se është koha e duhur që diplomacia ekonomike të dal në sipërfaqe, ndërsa tha se Komuna e Kaçanikut ka shumë kapacitete dhe potenciale të mundshme për zhvillimin e turizmit dhe zhvillim të ekonomisë në përgjithësi. Nënkryetari Bajra poashtu shprehu gatishmërinë e institucioneve komunale për të bashkëpunuar me secilin investitor të mundshëm, dhe njëkohësisht duke ofruar lehtësira në taksat komunale dhe në punët administrative.
